اسباب تساقط الشعر ١٠١

من ضمن المواضيع الي طلبتوها

موضوع تساقط الشعر 

اول بوست بيكون عن الاسباب 

مثل ماتعرفون الشعر يتأثر بعوامل خارجيه و داخليه( في الجسم) بذكر لكم اهم الاسباب.

عوامل خارجيه:

١- الضغط النفسي

بالنسبه لي الضغط النفسي كان من اول الاسباب الي اثرت في شعري.. المحاتاه و التفكير .. بنات لازم لازم لازم نتعلم شلون نتعامل مع الضغوطات الي تواجهنا .. مافي انسان ماعنده ضغوطات!! 

طرق العلاج:

اكتساب مهارات التحكم و التعامل مع الضغوطات عن طريق دورات او كتب او خبير في هالمجال

٢- تسريح الشعر المبالغ فيه

يعني كل يوم استشوار و فير و مثيت للشعر و جل الخ .. مع الوقت يندمر الشعر !! مب معقوله يعني اجهد شعري بتعريضه للحراره العاليه و المواد الضاره و في المقابل مابي شعري يطيح!! 

طرق العلاج:

التقليل التقليل التقليل (ههه وبس) 

مب لازم كل يوم تحرقين شعرج 

علي الاقل في الويك اند عطي شعرج راحه 

٣- الصبغات و العلاجات الكميائيه

ماله داعي اشرح وايد كلكم تعرفون اضرار الصبغات و العلاجات مثل تنعيم الشعر الخ من هالسوالف .. لانها باختصار مواد كميائيه تضر في الشعر علي المدي البعيد

طرق العلاج:

نفس الشي التقليل او عدم استخدامهم. 

في صالون عضوي في الرياض عندهم كيراتين و صبغات مافيها مواد ضاره.

٤- استخدام منتجات ضاره 

المقصود المواد الي تستخدم في بعض المنتجات مثل الشامبو و البلسم و الماسك. 

طرق العلاج:

طبعا البحث و استخدام البدائل (امازون و اهرب) فيهم انواع شامبو و كريمات و بلسم وكل شي يخص الشعر بدون المواد الضاره طبعا

عوامل داخليه: 

١-نقص في الفيتامينات

C, B, E, A, D, IRON, Magnesium, Protein, Niacin, Biotin, Zinc

هاي الفيتامينات وايد مهمه للشعر. ونقصها يسبب مشاكل منها التساقط.

طرق العلاج:

الحصول عليهم من الاكل او الحبوب

٢- الرجيم (انزال الوزن)

الرجيم القاسي الي اضراره اكثر من منفعته مب بس اطيح الشعر الا بتخليج اتقرعين. لانج بتسببين لنفسج امراض كثيره اولهم فقر الدم لان نظامج الغذائي بكون ناقص مايحتوي علي العناصر و المعادن و الفيتامينات المهمه لجسمج. بعد عندكم الي يضعفون بتدخل جراحي من اهم الاثار الجانبيه تساقط الشعر.

طرق العلاج:

الاستشاره الطبيه او التواصل مع اخصائي تغذيه او الاشتراك في برنامج دايت او انج تتثقفين من النت واتسوين اكل صحي و يساعدج علي تنزيل الوزن(سوالف طول الاسبوع بس دياي مشوي والريوق بيض خخخخ ماتنفع).

٣- مشاكل صحيه

الله يبعد عنكم الامراض. في امراض تاثر علي الجسم او ادويه تاثر بعد. هاي عاد تخصص الدكاتره. مثال فقر الدم الحاد 

طرق العلاج:

استشاره طبيه

٤- نقص البروتين

ماده البروتين مهمه جدا .. نقص ماده البروتين من نظامج الغذائي ياثر علي الشعر.

طرق العلاج:

مادة البروتين موجوده في السمك و اللحم والبيض.. اذا كنتي نباتيه تاخذين حبوب تحتوي علي البروتين.

الموضوع الجاي باذن الله عن  الوقايه و العنايه